Gebed: Terwyl ons siek is ...

Here, wanneer ons siek is en vrae vra, is dit U wat ons hand neem en ons dra.

Wanneer ons swak is en soms só moeg voel weet ons met alles het U 'n perfekte plan en doel. 

Net U ken die begin en einde van ons lewe en in geen situasie sal U ons ooit, ooit  begewe nie.

Daarom sal ons in gesondheid en siekte u naam prys. U is ons Geneesheer en u sal die pad vir ons aanwys!

Advertensie: Jacksons Pharmacy

Are you up late at night or early hours of the morning, feeling sick?

You don’t have to worry, we at Jacksons Pharmacy are awake too and will gladly help you to feel better! Come visit us or if you not up to drive, feel free to use our free delivery service. 

Address: 83B Long Street (Opposite Mercedes Benz dealer), make use of our ENTRANCE IN WEST STREET.  

Contact: 062 979 0119 for any assistance!

Vermeerder jou lag per dag ...

Indien jy Faceboek het, klik HIER en lees gerus die ware Jakob. Andersins kan jy afrol en verder lees. 

Hoe kan 'n mens te werk gaan om meer te lag as alles rondom jou nie lagwekkend is nie?

Hier is 'n paar wenke om meer lag in jou lewe te bring:

Maak 'n humorlêer - amper soos vroeër jare se plakboeke.
Vul dit met snaakse strokiesprente, gesegdes en grappies, soos jy dit raakloop. Blaai deur jou lêer as dinge besonder somber en stresvol lyk.
Jy sal lekker lag en dinge binne 'n japtrap weer in perspektief kan sien.

Kuier saam met vriende. Gelag is aansteeklik, kontak dus 'n paar vriende wat jou gemoed kan ophelder.

Bel 'n vriend wat jou gemoed verstaan en sal lig met sy/haar humor. 

Kyk na 'n aanlynvideo. Tik "snaakse video's" op jou gunsteling soekenjin en kies uit al die beskikbare keuses.

Skakel die TV aan. Met meer kanale as ooit tevore is daar altyd iets snaaks om na te kyk. (Dis nou as jy gelukkig is om 'n skottel te besit.)

Helder jou omgewing op waar jy die meeste ure per dag deurbring. Sit snaakse foto's van vriende en geliefdes teen jou muur, ook dié van jouself toe jy jou in 'n 'n snaakse situasie bevind het.

Speel met jou troeteldier. Diere stel ons in staat om onmiddellik te ontspan, en hulle bereidwilligheid om speelse aktiwiteite aan te pak, is 'n groot bron van vreugde.

Neem 'n lag-joga-klas. Lag-joga-lesse is die nuutste fiksheidsgier en word deesdae regoor die wêreld beoefen. Miskien is jy gelukkig om 'n klas naby jou te hê.

Doen sommige van die dinge wat jy as kind gedoen het vir ontspanning. Gaan na die dieretuin, 'n pretpark, boul of swaai! Jy sal vind dat hierdie aktiwiteite jou heeltemal wegneem van al die "swaar" dinge. En die ontsnapping sal wonders vir jou houding en gemoed doen.

Laastens, maak lag 'n prioriteit. Beplan elke dag tyd om iets te doen wat jou laat lag. As alles anders misluk, begin net lag. Selfs as gelag gedwonge is, bied dit baie van dieselfde voordele. Jy kan ontdek dat dit genoeg is om spontane lag te laat opwel.

Jy het 'n keuse: jy kan voortgaan om 'n 'grootmens' te wees, en al die frustrasies en teleurstellings in die lewe jou te laat onderkry, of jy kan lewenskragtigheid selfs in die moeilikste omstandighede inbring.

Maak glimlag 'n deel van jou lewe, en jy sal waarskynlik elke dag ten volle geniet en minder tyd by die dokter spandeer.

Klik HIER om sommer op die blog 'n paar goeie grappe te lees.

Lag jou siektes en sorge weg

Indien jy Faceboek het, klik HIER en lees gerus die ware Jakob. Andersins kan jy afrol en verder lees.

 
Ons het almal die ou spreekwoord gehoor dat lag die beste medisyne is. En soos baie volkswyshede, is daar meer as net 'n tikkie waarheid daarin.

Die Ou Testament verwys selfs na die genesende eienskappe van humor. Alhoewel ons voorouers dit nie wetenskaplik kon verklaar nie, het hulle intuïtief geweet dat lag goed was vir die liggaam sowel as die siel.

Meer onlangs beskryf Norman Cousins ​​in sy boek "Anatomy of an Illness" hoe hy homself genees het van 'n ernstige siekte deur humor te beoefen. Hy het glo ou Marx Brothers-flieks gekyk en gereeld onbedaarlik gelag.
Hy glo sy eie lag het sy siekte genees. Hy het daarna 'n lang en gesonde lewe gelei - tot in sy 80's!

Vandag het ons 'n beter begrip van hoe lag menslike fisiologie affekteer.

Hier is 'n hele paar maniere waarop lag jou gesondheid kan bevoordeel:

Dit verminder pyn. Ons liggame produseer hormone in reaksie op lag, wat pyn dood. Dit staan bekend as endorfiene.

Lag versterk die immuunstelsel deur die produksie van teenliggaampies te verhoog en die beskermende selle van die liggaam, soos T-selle, te aktiveer.

Herhalende gelag veroorsaak dat die liggaam op soortgelyke maniere reageer as op matige oefening,
Versterk die immuunfunksie. 'n Goeie buiklag verhoog die produksie van T-selle, interferon en immuunproteïene wat globuliene genoem word.

Cholesterol - Lag verlaag slegte cholesterol (LDL) en verhoog goeie cholesterol (HDL).

Lag is goed vir die brein. Lag kan ook die verstand verskerp. Proefpersone wat byvoorbeeld 20 minute lank na 'n snaakse video gekyk het, het beter gevaar met korttermyngeheue toetse as die studente wat 20 minute stil gesit het sonder om die video te kyk.

Lag kan jou lewensduur verleng.

Lag is beslis 'n noodsaaklike deel van gesonde veroudering.

Dit verminder spanning. As ons onder stres is, produseer ons kortisol-hormone. Lag verlaag die kortisolvlakke aansienlik en bring die liggaam in 'n meer ontspanne toestand.

Een van die belangrikste voordele van lag is dat dit stres verminder - byna onmiddellik.

Was jy al ooit in 'n ongemaklike situasie wat gebreek is omdat iemand 'n grap gemaak het?

Gelag stel 'n oorvloed vriendelike hormone vry, terwyl dit die vlak van streshormone verlaag. Lag verlaag die vlakke van kortisol en epinefrien, dit is hormone wat vrygestel word as die liggaam onder spanning verkeer.

Lag is natuurlik goed vir die hart. Lag verhoog die vloei van bloed na die hart, wat die bloeddruk laat daal.

Daarbenewens neem bloedvloei toe as jy na 'n komiese film kyk in teenstelling met 'n spanningsvolle film.

Die toename in bloedvloei na die kyk van 'n komedie is gelykstaande aan die toename tydens ligte oefening.

'n Goeie voorskrif vir 'n gesonde hart kan dus wees om te oefen, reg te eet en 'n paar keer 'n dag te lag.

Die ander goeie nuus is dat humor 'n positiewe uitwerking op die intellektuele en emosionele funksionering het.

Dit help om lewensbeproewinge en verdrukkings in 'n gesonde perspektief te plaas deur dit minder ernstig te laat lyk.

Lag help ons om vrees te oorkom.

Dit laat ons onsself minder ernstig opneem.

Dit aktiveer en verhoog ons kreatiwiteit.

[Dankie, Estelle, dat jy hierdie stukkie met ons deel.]

Dinsdag-denke: Soen iemand voordat jy gaan

Die voorstedelike trein wieg heen en weer. Die ysterwiele wat voortdurend skreeu teen die staal met die ritmiese klikke-klakke oor die spoorlasse.

Buitekant die venster is die bittere winterkoue op die landskap duidelik te bespeur terwyl die trein daardeur spoed soos ‘n onwelkome indringer. Die passasierstrein is vol verkluimde, verveelde passasiers wat elk vasgevang is in sy eie gedagtewêreldjie. Stroef staar elkeen voor hom uit sonder om die medepassasier oorkant of langs hom op te merk.

Skielik is daar ‘n klein seuntjie wat sy weg baan deur onwillige grootmensbene om by die opening op die bankie langs die venster uit te kom. Sy vader staan by die deur en hou ‘n wakende ogie dat die knapie nie wegraak tussen die baie passasiers nie. Die seuntjie is omring deur onvriendelike, half aan die slaap volwassenes. Wat ‘n brawe mannetjie het ek by myself gedink.

Toe die trein begin om die tonnel binne te gaan, gebeur daar iets heel onverwags en uit die bloute. Die klein seuntjie gly van sy sitplek af en plaas sy handjie op my knie. Vir ‘n oomblik het ek gedink dat hy by my verby wil gaan, terug na sy pa toe, dus skuif ek so effens uit die pad om plek te maak. Maar in plaas daarvan om verby te skuur, leun die seuntjie vooroor en rek sy koppie na my. Hy wil my seker iets vertel, dink ek by myself. Kinders ! Ek buig effens vooroor om te luister na wat die mannetjie my wil vertel. Weereens verkeerd! Hy soen my liggies op die wang.

Hy keer terug na sy sitplek en met vol genoegdoening kyk hy by die venster uit. Maar ek is geskok. Wat het gebeur? ‘n Klein seuntjie wat onbekende volwassenes op die trein soen? Tot my verbasing gaan die seuntjie voort om al my medepassasiers op die wang te soen. Senuweeagtig en half geskok kyk almal vraend na sy vader. “Hy is baie bly dat hy lewe,” antwoord sy vader. “Hy was baie siek en het by die dood omgedraai.”

Die trein stop en pa en seun klim van die trein af en verdwyn tussen die malende menigte. Die deure maak toe. Op my wang kan ek steeds die seuntjie se soen voel - ‘n soen wat my dwing om ernstige self ondersoek te doen.

Hoeveel grootmense is daar wat rondgaan en mekaar soen uit pure blydskap dat hul lewe? Hoeveel dink enigsins daaraan hoe bevoorreg hul is om te leef? Wat sal gebeur as ons almal net begin om onsself te wees en hierdie aangeplakte fasade af te pluk?

Die klein seuntjie het ons ‘n soete maar ernstige klap in die gesig gegee. Moet nie toelaat dat jy doodgaan, lank voordat jou hart gaan staan het nie!

Liefdesbrief aan Suid-Afrika

Liefdesbrief aan Suid-Afrika van 'n luisteraar ... (geplaas deur Amore Bekker van RSG)

Suid-Afrika, ek sit vanoggend langs jou hospitaalbed terwyl my trane vlak lê ... Ek byt op my tande dat die sluise van my oë nie moet oopgaan nie. Ek probeer om nie vir die wêreld te wys presies hóe seer my hart is nie. Ek klou krampagtig vas aan jou (nou nog) warm hand wat voel soos ‘n soel Karoonag. Waar jy met toe oë lê, wil ek jou vertel van die mooiste tye daar op die Letaba-brug, hoe die koue seewater my kleintyd op Bloubergstrand gekielie het as die son oor Tafelberg ondergaan, daar in jou moederstad.

Suid-Afrika, maak asb. jou oë oop, ons wíl jou nie verloor nie. Moenie dat hierdie virus jou onderkry nie ...  Jou koors is hoog, ek kan sien jy kry swaar.

Waar kan ek die dokter gaan roep, die medikasie het tans geen effek nie. Jou mense is moedeloos, hulle is bang ...

Suid-Afrika, waar ek hier neffens jou sit, sien ek hoe moeilik jy asemhaal. Ek wens vir Struisbaai se wind, net om jou weer te laat lag soos ‘n kind.

Suid-Afrika, ek bid vir jou, klou vas aan hierdie lewe asseblief.

Ek wil ‘n nat lappie op jou voorkop sit, enige iets om jou te verfris soos die see se sproei op Seepunt se promenade.

Ek is KWAAD dat jy hierso beland het, jou geld is gesteel, jou mense vermoor hulle geliefdes. Ek kan verstaan dat dit nou sy tol eis.

Suid-Afrika, ek soebat jou. Klou vas aan hierdie lewe. Moenie nóu moed opgee nie. Dink aan Roete 62, die masjestueuse Drakensberge. Jy is mos al baie heuwels oor, ek wil só graag weer hê dat jy ‘n visarend hoor!

Ek wil weer saam met jou melktert eet, om ‘n kampvuur die hitte geniet.

Kom ek maak jou toe met hierdie kombers van hoop, net soos jy my altyd omvou het met ‘n gevoel dat ek aan jou behoort.

Byt vas Suid-Afrika, ons sal by jou staan met geloof, hoop en ‘n reënboog vol liefde.

Karina van die Kaap.

Sonder God, kan ons nie ...