Die ouderling met die waterwysvermoë...

Van ouderling Hawie gepraat, hy was 'n man van vele talente...

Die magnetiese veld van die aarde werk op baie mense en oom Hawie was een van hulle -  hy kon water wys! Kort nadat ds. JH Siebert in 1968 in die gemeente begin werk het, het die kerkraad besluit om te boor vir water.

Oom Hawie het die betrokke dag eers met 'n stok en daarna met 'n bottel water geloop... Voetjie vir voetjie het hy agter die kerksaal geloop... die ene konsentrasie in die maer lyf. Ondergrondse water werk op hom, dis 'n gawe wat hy het en wat hy tot voordeel van die kerk gaan aanwend... 'n hele klompie toeskouers hou die petalje dop - die wat glo dat dit werk en natuurlik is daar die skeptici wat in hulle hart hoop dit werk nie - die plek waar hulle kan boor, word gemerk.

Mev. Siebert het ook geloop en alhoewel sy ligte tekens van water gekry het, was dit nie naastenby so sterk soos oom Hawie s'n nie. 

Tot almal se groot vreugde word sterk water gekry en die boorgat voorsien vandag nog die kerkgronde van water!

[Inligting: Mnr. Schalk Pienaar - kassier van gemeente vanaf 1961 - 2016]

Ons Huis se ouderling met 'n roeping!

DIE BESTUUR VAN DIE MSB

Voor: Mnre. PS Venter (sekretaris), AJ van

der Merwe (voorsitter), JP Havenga (o/voorsitter)

Agter: Ds. JH Siebert, FR Maré (tesourier)

Bron: Dutoitspan Kimberley

Mnr. JP Havenga of beter bekend as oom Hawie van Freemanplek, was definitief die aktiefste en getrouste ouderling in die bestaan van die NG Gemeente, Dutoitspan Kimberley. Hy was die ouetehuis, wat binne die gemeente se grense val, se ouderling... tot hulle groot voordeel.

Oom Hawie was iemand met 'n passie vir dit wat hy gedoen het en iemand wat nie te bang was om die ekstra myl te loop nie.

Hy was reeds in ds. WJ Steenkamp se tyd (https://dutoitspan.blogspot.co.za/p/predikante.html) in die vroeë sestigerjare, hulle ouderling.

Wat het oom Hawie so besonders gemaak?

Hy was elke dag dáár - hy het dienste vir die inwoners gehou, bidure, aandgodsdiens, saam met hulle tee gedrink, soms sommer vir aandete gebly, miskien die nuus saam met hulle gekyk, maar hy het altyd die belange van die inwoners op sy hart gedra. Elke Sondag in die konsistorie het hy verslag gedoen en was die predikant en die kerkraad op hoogte van elke sieke, elkeen wat 'n familielid aan die dood moes afstaan, vreugdes van kinders en kleinkinders, maar hulle het ook geweet wie 'n behoefte aan 'n predikantsbesoek gehad het.

Hy het altyd ouetehuis toe gestap en praatjies langs die pad met mense en gemeentelede aangeknoop. Nooit weer was daar 'n ouderling van sy kaliber nie. Met sy afsterwe het die ouetehuis hulle ambassadeur verloor.  

Elke aftree-oord het eintlik 'n ouderling soos oom Hawie nodig!!

[Inligting: Mnr. Schalk Pienaar - kassier van gemeente vanaf 1961 - 2016]