Saterdaglagmedisyne - Mike en Gawie

* Die polisie stop vir Mike met 'n kombi vol pikkewyne.

"En waar dink jy gaan jy met hierdie pikkewyne?" wil die konstabel weet.
"Hierdie pikkewyne is almal my vriende," antwoord Mike. "ons ry maar net 'n bietjie rond."
"Nee, nee, dit mag nie," sê die konstabel, en beveel Mike om die pikkewyne dadelik dieretuin toe te vat.
Die volgende dag stop dieselfde konstabel vir Mike op dieselfde plek, weer met die kombi vol pikkewyne. Hierdie keer het die pikkewyne egter almal sonbrille op.
"Ek dog ek het jou gister gesê om die pikkewyne dieretuin toe te vat?" vra die konstabel kwaad.
"Maar ek het," antwoord Mike.
"En vandag gaan ons strand toe."

* Gawie hakkel vreeslik en sukkel om werk te kry. Hy beland einde laaste by die Bybelgenootskap, maar kry weer slegte nuus. Die omie sê vir hom dat hulle hoofinkomste uit huis tot huis Bybelverkope bestaan. Omie kry hom jammer en gee hom 'n job, met die gedagte dat hy seker na 'n dag of twee self tou gaan opgooi. Einde van week 2 en almal se verkope word gecheck vir hulle kommissie. Gemiddelde per persoon wissel tussen 17 en 23. Kom by Gawie en syne is 267! 

Omie:" Onmoontlik! Hoe de blikkies het jy dit reggekry?" 

Gawie:" Mmmmmmaklik, oom. Ek vvvvvra nnnnnnnnet. Wwwwwwil jy n Bbbbbbybel kkkkkkoop of mmmmmoet ek dit vvvvvir jou llllllllllllees?"

Gedig: Afskeid

Die uurglas het reeds leeg geloop,
die populierboom is gestroop
van elke goue blaar.
En ons, ons staan beteuterd rond
en tuur half skuinsweg op die grond –
soos vreemdes vir mekaar.

Ek weet jy wil nog met my praat,
maar onder in die donker straat
hoor ek die motor toet.
En vir die derde, vierde keer
sit ek my loodswaar koffer neer
om jou verlaas te groet.

Koos du Plessis

Hartsake oor 'n koppie tee: Ek glo so ...

Wat as al hierdie tyd, 

al hierdie stryd, 

jou na 'n pragtige hoofstuk 

in jou lewe gelei het?
Wat as alles wel uitwerk, 

al lyk dit nie nou so nie?
Wat as wie ek word, 

is wie ek heeltyd nodig gehad het?
Wat as al hierdie harde werk 

tot wonderlike dinge lei?
Wat as jy negatiwiteit met optimisme vervang?
Sou jou gedagtes en gedrag ook verander?
Ek glo so.

Teetyd: Magriet Koch

Vandag drink ons 'n koppie tee saam met Magriet Koch. En so tussen die teedrinkery word nuus en staaltjies met mekaar gedeel.

In haar ligblou bloes straal Magriet kalmte, warmte en vrede uit. Sy is gebore op Williston, 'n rustige en tipiese Karoodorpie in die Namakwa-distrik van die Noord-Kaap. Williston, is soos die res van die Noord-Kaapse dorpies, bekend vir sy gasvrye mense. (Volgende keer as RSG en Virseker weer 'n kultuurkaravaanroete beplan, kan hulle gerus by Williston met sy unieke argitektuur 'n draai maak.)

Vir agt jaar het sy in Kimberley gebly voordat sy haar skredes twee jaar terug na Ons Huis gewend het.

Sy weet verseker dat die Here elke dag haar lewe rig en haar vul met Sy vrede wat alle verstand te bowe gaan.

Uit die Groot Karoo: Schalk se lewensnippers

Volunteers Make a Difference

Volunteers play a vital role in improving the lives of residents at old age homes by providing essential social, emotional, and practical support. Their presence helps combat the severe loneliness and isolation that many elderly residents face.

Ultimately, volunteers bridge the gap between the care home and the outside community, ensuring that elderly residents feel valued, remembered, and deeply cared for.

Your kindness, compassion, and willingness to serve help brighten the lives of our residents.

Interested in volunteering? We'd love to welcome you to our ACVV family.

Vandag se internetgebed vir jou: U het my uitverkies

Dankie, Here, dat U my uitverkies het, iets wat ek nie verdien het nie. U het my egter kom haal uit my sondige natuur en met barmhartigheid beklee met u geregtigheid. U het my sodanig herstel, dat ek nou U werktuig is om goeie werke te doen wat U welbehaaglik is. Aan U, Jesus, kom toe die eer en heerlikheid, tot in alle ewigheid. Amen.

Leer ken ons personeel: Claudia Poliesie

Claudia stem volmondig saam met C Louis Leipoldt dat Oktober die mooiste mooiste maand is. Die rede? Sy is op 1 Oktober 2026 as huishoudelike administratiewe beampte by Ons Huis aangestel.  

Sy het haar eerste lewenslig in Kimberley aanskou en is nie sommer van plan om haar wortels hier uit te trek nie. Dus 'n Kimberliet in murg en been en 'n Ons Huiser in woord en daad.  

Versigtig en agter 'n masker het sy haar eerste treë by Ons Huis in 2020 gegee. Covid het mos sy eie stel reëls gehad ... Sy en die inwoners het mekaar met maskers voel-voel uitgekyk en eers baie later het sy die mense agter die maskers leer ken en hulle vir haar. Hulle het mekaar se familie geword en  daarom is dit maklik om mekaar se hartseer, vreugdes en verlanges te deel. Net een kyk na 'n inwoner en sy kan sommer sê wat in daardie hart aangaan.  

Haar postitel in 2020 het gesê: Algemene assistent, haar lyftaal het gesê: liefde. Sy het die voorreg gehad om by die hoofgebou en by die siekeboeg te werk. Die ritme, energie en tempo verskil in hierdie twee eenhede en ervaring kry 'n mens net deur praktiese ondervinding. Claudia het saam met haar werk gegroei en dit het haar passie geword.

Haar werk is haar trots en sy wil graag voetspore los waarin ander eendag kan loop. Claudia straal behoorlik as sy oor haar werk en die inwoners gesels. Om met bejaardes te werk is vir haar 'n vreugde. Dis hier, by Ons Huis, waar sy graag 'n verskil wil maak.  

Vir haar familie - die Ons Huis-inwoners - wil sy sê: "Maak vrede met die verlede. Geniet die laaste deel van jou wedloop en koester die herinneringe wat jy op jou lewensreis gemaak het."

Claudia se hare tree dikwels as boodskapper by verskillende geleenthede op. Met Internasionale Alzheimer-dag het haar pers hare gesê: "Raak betrokke." En op hierdie stadium sê haar kort kapsel: "Ek ondersteun my vriendin op haar kankerpad"

In 'n neutedop is Claudia 'n omgeemens wat uitreik na ander in nood, wat na elkeen se hartstorie luister en mense met liefde toevou. 

Claudia, mag jou pad saam met Ons Huis een van vreugde wees en mag al jou werksverwante drome waar word. 

Ons Huis se FB

Kom loer gerus op Ons Huis se nuwe FB-blad in - 

volg ons vir interessante gebeure en kom drink gerus 

'n koppie tee saam met ons inwoners. 

Lag, gesels en staaltjies uit toeka se dae,

is elke dag op die teespyskaart. 

Klik gerus HIER! 

Oomblik van stilte: Rom. 1:9

GOD ... is my getuie dat ek gedurig in my gebede aan julle dink. 

Die gróótste geskenk wat ons aan ons dierbares kan gee, is die geskenk van óns gebede. Ons het hulle lief omdat ons dierbare Heer hulle aan ons leen en hulle kósbaar en úniek gemaak is deur die Vader se líéfdevolle hande. 

Ons sê ook dankie vir die spesiale bydraes wat hulle vir ons én vir die wêreld maak. Hierdie positiewe gedagtes wat ons omtrent hulle koester, gaan sáám met ons gebede uit om hulle te seën en te drá in álles wat betrekking het tot hulle lewens.

Wanneer ons vir dierbares bid, beperk ons hulle nie tot dit wat ons dink wat tot hul hoogste heil sal wees nie. Ons plaas hulle ónvoorwaardelik in God se sorg, en ons weet *wáár* HÝ in beheer is, sal net dit wat reg en goed is met húlle gebeur. Ons gebede wys hoe *líéf* ons hulle het en hoe *dánkbaar* ons is vir die voorreg om óns lewens met húlle te kan deel.

In die stilte van ons gebed word ons óóp kanale waardeur die liefde van God in ons harte, soos 'n suiwer stroom deur ons kan vloei tot ons eie seën, maar ook vir húlle vir wíé ons bid.
.
Heer, laat Ú helder lig skyn in die lewens van elkeen vir wie ek bid. Dankie Jesus. Amen.

Saterdaglagmedisyne - Die ander kant van liewe ouma

* Ouma sit met 'n glas wyn, op die patio saam met oupa. 

Sy sê: "Ek is so lief vir jou, ek kan nie sonder jou lewe nie." 

Oupa vra: "Is dit nou jy of die wyn wat praat?" 

Sy antwoord: "Dis ek wat met die wyn praat!!!"

* Daar is 'n pragtige park met groot bome en baie bankies oorkant die aftreeoord. Baie van die inwoners gaan skep 'n bietjie vars lug in die vryheid van die park. Eendag loop 'n man vir die eerste keer deur die park. Hy sien 'n vrou op 'n bank sit en lees met 'n hond wat langs haar lê. Hy is baie lief vir honde en wil die hond streel, maar eers vra hy haar: "Mevrou, byt jou hond?"
"Nee, my hond byt nie."
Die man vryf oor die hond se kop, maar die dier hap sy hand dat die bloed loop. Woedend skree hy vir die vrou: "Ek dog jy sê jou hond byt nie!"
"Hierdie hond,'' sê die vrou koel, ''is nie my hond nie."

Gedig: Die Goue Jare

Die spieël wys dalk 'n ryp herfsblaar,
met silwer drade in die haar,
en lyne wat die jare tel,
van elke storie wat ons vertel.

Maar kyk verby die brose vel,
daar's nog 'n vonk wat drome spel!
Die gees word nie deur jare perk,
'n positiewe hart bly sterk.

Die bene loop wel bietjie stadiger nou,
maar kyk hoe blou is nog die hemelruim se vou.
Elke nuwe dag is steeds 'n skat,
'n vars stuk pad op ons lewensmat.

Met gister se wysheid en vandag se vrede,
glimlag ons sag oor die verlede.
Want oudword is 'n voorreg, 'n ligte lied,
vir die hart wat kies wat die skoonheid bied.

So laat die grys hare maar blink in die son,
ons drink nog lank uit die lewensbron.
Die oë mag dalk swakker sien,
maar die siel sien die liefde wat ons verdien.

[KI-geïnspireerde gedig]

Ouma se wenke: Skoonmaakwenke

* Gordyne: voeg asyn by uitspoelwater van gordyne. Dit sal verhinder dat stof maklik aan gordyne vaskleef. 

* Was kantgordyne in ‘n kussingsloop sodat dit nie beskadig raak in die wasmasjien nie.

* Handsakke: maak handsakke en skoene skoon met dettol.

* Sokkies: week wit sokkies in soutwater voordat jy dit was, dit verwyder alle vlekke.

* Stoele: stoele wat met leer oorgetrek is, kan pragtig nuut lyk as dit met ‘n bietjie melk gewas word.

Idioom: As twee hande mekaar was, word albei skoon

Hartsake oor 'n koppie tee: Dis maklik om van God te vergeet!

* Veral wanneer dit met ons baie goed gaan, 

ons min bekommernisse het en 

ons buitengewone voorspoed geniet 

*Dan kan ons gou onder die illusie leef 

dat ons prestasies, suksesse en rykdom uit onsself is

en dat ons God nie regtig so nodig het nie

* Voorspoed het mos ‘n manier om ons gou 

van ons kinderlike en afhanklike geloof te stroop

En wanneer dit gebeur het, 

is ons presies waar Satan ons wil hê

* Wanneer ons op ons eie missie is en 

ons hand uit God s’n laat gly,

kan die bose met ons maak net wat hy wil

Iets wat tragiese gevolge kan hê!

* Liewe medegelowige, 

wanneer dit met jou goed gaan, jy gelukkig is en 

op alle terreine van jou lewe die goeie geniet, 

beleef jy ‘n wonderlike fase in jou lewe

* Geniet dit!

Want dis God se geskenk van goedheid aan jou!

Maar weet ook dat niks wat jy is of het, 

daar sou wees sonder die genade van jou Vader nie

* God verwag van ons dat ons in slegte en 

goeie tye Hom met dieselfde passie sal aanbid
Dis wanneer ons dubbele seën ervaar!

[Aangestuur]

Teetyd: Esna van der Merwe

Vandag drink ons 'n koppie tee saam met Esna van der Merwe, 'n inwoner wat die afgelope jaar Ons Huis haar tuiste noem. In haar rooi bloes is sy nie bloot net aanwesig nie; sy lééf met passie. Esna gryp die lewe met albei hande aan en Galasiërs 5:22* is haar daaglikse riglyn.

Gebore en getoë in Upington, is sy 'n Noord-Kapenaar in murg en been. Upington is mos bekend vir sy moordende warm dae, en dié dorp ding mee met ander Noord-Kaapse plekke om die titel van warmste plek in die land, maar Esna sê toe hulle kinders was, was speel baie hoog op hulle lysie - die hitte ten spyt. Hulle het nooit besef hulle bly in só 'n warm deel nie en wat jy nie weet nie, pla jou nie - vir hulle kinders was die hitte normaal. Deesdae, met die druk van 'n knoppie, kan jy presies weet hoe warm dit waar is op 'n gegewe moment, so miskien sou hulle met vandag se kennis ook oor Upington se hitte gekla het ...    

Nadat hul lewe 'n draai in Vryburg, die Texas van Suid-Afrika, gemaak het, het hulle in Kimberley kom aftree. Die stad wat bekend is vir sy vriendelike en gasvrye mense.

Een koppie tee is nie genoeg om die mens agter die teekoppie te leer ken nie. Daar sal nog baie koppies tee gedrink moet word ... 

*Gal. 5:22 Die vrug wat die Gees voortbring, is: liefde, vreugde, vrede, geduld, vriendelikheid, goedheid, getrouheid, sagmoedigheid en selfbeheersing.

Uit die Groot Karoo: Schalk se lewensnippers

Aan alle matrikulante

Aan ons kleinkinders en agterkleinkinders en alle matrikulante, 

ons wens jul die beste toe vir die groot eksamen op hande. 

Leer hard, maar die belangrikste van alles 

vertou elke dag aan die Hemelse Vader toe, 

vra Hom om jou deur elke vraestel te lei. 

Sterkte, ons bid vir julle.

Ons Huis-inwoners

Vandag se internetgebed vir jou: Vertrou op God se woord

Here, ek vertrou U. Alles gebeur vir my ten goede, al lyk dit verkeerd of onregverdig teen my, sal God dit ten goede laat uitwerk. Dit is God se woord; oor elkeen van sy kinders uitgespreek. Laat my geloof my nooit in die steek laat nie; ek vertrou net op God se woord. Die Here gee en die Here neem, geloofd sy die Here. Die Here is my Redder en sal my nooit verlaat nie. Amen.

Ons Huis: 'n Blomtuin vol van kleure

Oomblik van stilte: Dis maklik om van God te vergeet!

Dis maklik om van God te vergeet, veral wanneer dit met ons baie goed gaan, ons min bekommernisse het en ons buitengewone voorspoed geniet. Dan kan ons gou onder die illusie leef dat ons prestasies, suksesse en rykdom uit onsself is ... en dat ons God nie regtig so nodig het nie.

Voorspoed het mos ‘n manier om ons gou van ons kinderlike en afhanklike geloof te stroop.

En wanneer dit gebeur het, is ons presies waar Satan ons wil hê.

Wanneer ons op ons eie missie is en ons hand uit God s’n laat gly, kan die bose met ons maak net wat hy wil. Iets wat tragiese gevolge kan hê!

Liewe medegelowige, wanneer dit met jou goed gaan, jy gelukkig is en op alle terreine van jou lewe die goeie geniet, beleef jy ‘n wonderlike fase in jou lewe. Geniet dit! Want dis God se geskenk van goedheid aan jou!

Maar weet ook dat niks wat jy is of het, daar sou wees sonder die genade van jou Vader nie. God verwag van ons dat ons in slegte en goeie tye Hom met dieselfde passie sal aanbid.

Dis wanneer ons dubbele seën ervaar.