Hartsake oor 'n koppie tee: Hartsmoegheid

Daar is dae wat jy net eenvoudig moeg is - nie net liggaamlik nie, maar in jou hart. Dis 'n moeg wat jy nie vir iemand kan beskryf nie. Dis juis in daardie oomblikke wat God sag fluister: “Ek gee jou nuwe krag.”

Hy sien jou trane, hoor jou gebede en weet waardeur jy gaan. Hy kan sien dat die opdraandes te veel word en dat jy nie altyd vastrapplek kry voor jou volgende tree nie. Hy los jou nie waar jy is nie. Hy lei jou weer op die regte pad, stap saam met jou, en vul jou met moed waar jy moed verloor het.

Jy is nie alleen nie… God is besig om jou hart weer sterk te maak.

Gebed:
Here, dankie dat U my altyd hoor wanneer ek roep.
Dankie dat U my nuwe krag gee wanneer ek nie meer kan nie.
Lei my vandag op U pad van vrede en hoop, en herinner my dat U nooit moeg word om my te dra nie. Amen