Ludwig von Beethoven, een van die wêreld se grootste musici, is gebore in 'n musikale familie in Duitsland. As kind het hy baie eensame ure deurgebring om elke dag sy musiek te oefen.
Toe hy elf jaar oud was, het hy reeds sy eie musiek gekomponeer en 'n orkes gedirigeer. As adolessent is hy Wene toe vir verdere studies. Daar het hy beroemd geraak, maar nie ryk nie.
Een aand terwyl hy gaan stap het, het hy by 'n skoenmaker se huis verby gestap. Beethoven het iemand binne-in die huis een van sy komposisies hoor oefen. Hy het gaan staan om te luister en gehoor hoe die meisie sê sy wens sy kon hoor hoe 'n ware musikus die stuk reg speel.
Beethoven het by die huis ingestap en dadelik opgemerk dat die meisie voor die klavier blind was. Hy het aangebied om die stuk vir haar te speel. Hy het langer as 'n uur vir haar klavier gespeel. Terwyl hy gespeel het, het dit donker geword en die enkele kers in die vertrek het uitgebrand.
Buite teen die swart hemelruim het die maan helder geskyn en sy strale glinsterend laat val deur die vertrek waar Beethoven sy pragtige musiek gespeel het. Hy was so geïnspireer deur die waardering van die jong vrou en die skoonheid en atmosfeer in die vertrek dat hy sy beroemde "Maanlig-sonate" gekomponeer het.
[Outeur onbekend]
No comments:
Post a Comment