Het jy geweet 91% van alle selfooneienaars se selfone is 24/7 binne een meter van hulle hande af? 20% van alle tieners se
liefdesverhoudings word deur middel van SMS-boodskappe gesmee en 16% van alle
tieners beëindig liefdesverhoudings deur middel van SMS-boodskappe. Nou wil jy
sommer dadelik vra: watter tipe verhouding kan jy bou in 160 karakters op ‘n
selfoonskerm? Maar aan die ander kant is dit die nuwe haastige
kommunikasiewêreld waarbinne ons leef.
Maar wag, voordat ons dink dis net vandag se wêreld wat dit
regkry om by wyse van korter boodskappe effektief te kommunikeer - gaan kyk
bietjie na die meeste gebede in die Bybel.
Hulle kan almal binne ‘n paar minute
gebid word. Die Ons Vader (Matteus 6), asook Paulus se gebede vir sy gemeentes
is altyd kort en kragtig. Geen wonder dat Jesus in die Bergrede sê God word nie
deur ‘n stortvloed van woorde beïndruk nie. Daar’s nooit hemelse stophorlosies
ter sprake wat ons gebede se waarde of diepte meet aan die tydsduur daaraan
verbonde nie. Bid opreg, eerlik en uit die hart in Jesus se Naam. Sê dan amen.
Dis lank genoeg.
Stephan Joubert (www.ekerk.co.za)
No comments:
Post a Comment