Huisgenotjies: Dis mos gek!

Op 1 April is daar net twee soorte mense: dié wat gek is na Aprilgrappe en dié wat dink Aprilgrappe is gek.

* Die linkerhandbielie

In 1988 het Burger King 'n volbladadvertensie in USA Today laat plaas om die linkerhandbielie, wat spesiaal vir die 32 miljoen linkshandige Amerikaners gemaak word, aan die publik bekend te stel. Die linkerhandbielie bevat dieselfde bestanddele as die bekende oorspronklike Whopper (blaarslaai, tamaties, hamburgerfrikkadel), maar al die geurmiddels word vir die gerief van die linkshandige eters 180 grade gedraai, is gesê. Duisende linkshandiges het dié Aprilgrap geglo en sulke hamburgers bestel.

* Tieners met getatoeëerde ore

Op 1 April 1994 word op die radioprogram, All things considered, aangekondig dat maatskappye soos Pepsi die tatoeëering van tieners se ore met die logo van deelnemende maatskappye gaan begin borg, mits dit twee sentimeter groot is. Tieners wat getatoeëerde logo's op hul ore vertoon, sou lewenslank 'n afslag van tien persent op die produkte van die betrokke maatskappy ontvang. Honderde tieners het met groot entoesiasme op die aanbod gereageer.  

* Rekord-spaghetti-oes

Op Maandag, 1 April 1957, is daar oor die BBC-nuusprogram Panorama berig dat die landbougemeenskap van Switserland danksy 'n matige winter en die sukses wat met die bestryding van die gevreesde spaghetti-kalander behaal is, 'n rekord-spaghetti-oes in dié oesjaar verwag.  

Beeldmateriaal van plaaswerkers wat stringe spaghetti uit bome ryg, is aan die kykers vertoon. baie mense het dit onwrikbaar geglo en ingeskakel om navraag te doen oor die kweek van spaghettibome, waarop hulle die volgende antwoord van die BBC ontvang het: "Plaas 'n spaghetti-takkie in 'n blik tamatiesous en hoop vir die beste." Vir een jaar sou spaghetti volop wees!!!

[Vrouekeur, 1 April 2005] 

Gedig: Vroegherfs

Die jaar word ryp in goue akkerblare,
in wingerd wat verbruin, en witter lug
wat daglank van die nuwe wind en klare
son deurspoel word; elke blom word vrug,
tot selfs die traagstes; en die eerste blare val
so stilweg in die rook-vaal bos en laan,
dat die takke van die lang populiere al
teen elke ligte môre witter staan.
O Heer, laat hierdie dae heilig word:
laat alles val wat pronk en sieraad was
of enkel jeug, en vér was van die pyn;
laat ryp word, Heer, laat U wind waai, laat stort
my waan, tot al die hoogheid eindelik vas
en nakend uit my teerder jeug verskyn.

[N.P. van Wyk Louw]

Klik HIER

Ouma se wenke: Skep gesonde gewoontes

* Gereelde oefening

* Gesonde kos

* Leef voluit

* Aanvaar nog steeds uitdagings

* Geniet die lewe

Hartsake oor 'n koppie tee: Wonderlike genade

God het elkeen van ons só lief, dat Hy Sy eie Seun gestuur het om in ons plek vir ons sondes te sterwe, sodat elkeen wat gewillig is om Hom as Verlosser aan te neem, dadelik vergifnis mag ontvang en die ewige lewe kan beërwe. En wat meer is, aan almal wat Hom aangeneem het, gee Hy die reg om kinders van Hom genoem te word. En as Sy kinders ontvang ons hier reeds die vreugde, vrede, blydskap en hulp wat ons nodig het vir elke dag en elke uur.

Wat 'n vreugde om soveel genade uit ons Vader se hand te ontvang.

Uit die Groot Karoo: Schalk se lewensnippers

Vandag se internetgebed vir jou: Help ons om te besef dat ons na u beeld geskep is

Skeppergod, U skep die aarde en alles daarop.
U skep alles in verhouding tot mekaar en U skep alles goed.
U skep man en vrou na u beeld en seën beide.
Help ons om u beeld te sien in hulle wat ly as slagoffers van geweld.
Help ons om die gesig van geweld te herken in ons midde veral as dit ’n gewoon-alledaagse masker dra.
Help ons om geweld teen te staan
en om slagoffers van geweld met menswaardigheid te hanteer.
Help ons om te besef dat ons na u beeld geskep is.
Help ons om in Jesus se voorbeeld te volg en om telkens te soek vir lewegewende alternatiewe tot geweld.
Help ons om geweld te beveg in die MIV en vigs-era
omdat dit voorkoming belemmer en effektiewe behandeling teenstaan.
Ons bid dit met vrymoedigheid in die naam van Jesus Christus.
Amen.

(Charlene vd Walt opgeneem in Woord & Fees 2013-2014, uitgegee deur BM)

Oomblik van stilte: Ps. 63:3-5

So het ek U in u heiligdom aanskou, om u sterkte en u heerlikheid aan te sien.

Want u goedertierenheid is beter as die lewe; my lippe moet U prys.

So sal ek U prys my hele lewe lank, in u Naam my hande ophef.

Ps. 68:6 'n Vader van die wese en 'n regter  van die weduwees is God in sy heilige woning. 

Die Here wil jou seën in hierdie week.

Jy sal die goedheid van God aanskou. 

Hy wat omsien na die wese is ook jou Vader en sal jou versorg.

Plaas jou vrese by die voete van Jesus en rig jou versoeke aan Hom

Hy sal vir jou voorsien.

Prys die Here vanoggend, en wees bly!

Here, my gebed rig ek tot U, want U sal vir my voorsien; ek kom klop aan u deur en U sal vir my oopmaak. U het belowe dat, elkeen wat bid ontvang; en hy wat soek, vind; en vir hom wat klop, sal oopgemaak word (Matt. 7:7&8). Ps. 67:8 God sal (my) seën, en al die eindes van die aarde sal Hom vrees. Ek loof U vanoggend met oorvloedige blydskap in my hart. Amen.

[Aangestuur deur Pieter Swanepoel]

Saterdaglagmedisyne - Allerlei

* Kennisgewing op Kimberley klub se deur: Moenie drink en bestuur nie. Jy tref dalk 'n gat in die pad en mors alles uit!"

* 'n Politikus wat sy kiesers baie jare terug in Kimberley toegespreek het, word in die rede geval deur 'n harde stem van agter uit die saal: "Ek sou nie vir jou gestem het nie, al was jy die Engel Gabriël."

Politikus: "As ek die Engel Gabriël was, sou jy nie in my kiesafdeling gewees het nie."

* 'n Jongman sit in die trein na Kaapstad en kou aanhoudend kougom. Oorkant hom sit 'n ou tannie. Nadat sy hom 'n rukkie dopgehou het, sê sy: "Dit help nie jy praat met my nie, jongman. Ek is absoluut stokdoof." 

Gedig: Die Vlakte ('n Uittreksel van die gedig)

Strofe 1
Ek slaap in die rus van die eeue gesus,
ongesien, ongehoord,
en dof en loom in my sonnedroom,
ongewek, ongestoord.
Tot die yl-bloue bande van die ver-verre rande
skuif my breedte uit,
wyd-kringend aan die puur al-omwelwend asuur,
wat my swyend omsluit.

Strofe 4
Soos ‘n vlokkie skuim uit die sfere se ruim
kom ‘n wolkie aangesweef,
maar hy groei in die blou tot ‘n stapelbou
van marmer wat krul en leef -
kolossaal monument op sy swart fondament,
waar die bliksem in brul en beef.

En o, met my is die windjies bly:
hul spring uit die stof orent
en wals en draai in dwarrelswaai
oor my vloer, van ent tot ent;
die gras skud hul wakker om same te jakker
tot hy opspring uit sy kooi
en soos mane en sterde van jaende perde
sy stingels golf en gooi.
Met dof-sware plof, soos koeëls in die stof,
kom die eerste druppels neer,
tot dit ruis alom so deur die gebrom
en gekraak van die donderweer.
Met kloue vooruit om te gryp en buit
jaag ‘n haelwolk langs verby,
soos ‘n perde-kommande wat dreun oor die lande
vertrap en gésel hy -
en sy lyke kleed sien ek ver en breed
in die awendson gesprei.

* Jan F. Celliers

[Ons kuier by die ouer digters, want dit is die gedigte wat vasgelê is in ons inwoners se geheue. Lees Die Vlakte proe-proe en kyk hoe beskryf dit die storm.]

Die 8-5-engel van kamer 57 het Dinsdag, 17 Maart 2026, gegroet ...

Marie Moses se pad het vir 'n wyle met dié van Ons Huis gekruis toe sy meer as die ekstra myl geloop het. Lees gerus die artikel HIER wat op 21 Maart 2019 geskryf is.   

Marie was 'n stabiele en gerekende pilaar in die gemeenskap. Sy was iemand wat gesag uitgestraal het. Haar ingebore statigheid het onwillekeurig respek van haar medemens afgedwing. Sy was 'n voorbeeld vir diegene wat haar pad gekruis het. Op haar stil manier kon sy jou aan die dink sit. Wysheid en logiese insig was deel van haar samestelling.

Sy het altyd gesê dat 'n mens nooit moet gaan stilsit nie ... dan gaan 'n mens gou dood. 'n Mens moet besig bly en op hierdie manier het sy ook gegroet.

Ons eer haar nagedagtenis - mag sy nog lank lewe in die harte van hulle met wie haar lewenspad gekruis het. 

Foto's: Linda Moses

Ouma se wenke: Eet versigtig

* Beperk kitskos, koekies, sjokolade, skyfies, vetterige en verwerkte vleis, lekkers en gebakte produkte.

* Vermy soet drankies. Dit versadig nie, maar kan gewigstoename veroorsaak.

* Kies minder souterige voedsel en gebruik minder sout by die huis ten einde hoë bloeddruk te verhoed.

* Vrugte en groente is gesonder opsies. 

[Alles wat lekker is, is nie altyd gesond nie! Lekker eet!]

Terugflits: Noem hom op sy naam

'n Heerlike leesstukkie wat vra om 'n tweede keer gelees te word. Proe die woordspeling op die tong. 

Dit was liefde met die eerste oogopslag vir Daniël van Daniëlskuil en Mary van Marydale toe hulle albei toevallig koffie op Koffiefontein bestel het. 

Hy was 'n fiksheidsintrukteur van Ficksburg en sy was 'n jong weduwee van Richmond. Hoewel albei in hul dertigs was, wou Daniël graag op die tradisionele manier ouers vra op Askham.

Hy was angstig dat hulle dalk stry sou kry op Strydenburg, hy hulle dalk sou moes soebat op Soebatsfontein of hulle hom dalk verkeerd sou verstaan op Verkeerdevlei, maar haar ouers het naby Vrede geboer en minder as 'n maand later het hulle die knoop in Welkom deurgehak.

Dit was die troue van die jaar waar geen uitgawe ontsien is nie. Net die beste was goed genoeg vir sy Mary. Rose uit Rosendal, die res van die blomme uit Bloemfontein, hoenderpastei uit Hennenman en springbokpatee uit Springbok.

Die hele familie het die uitnodigings aanvaar. Die Van Wyks van Van Wyksvlei, die Rouxs van Rouxville, die Jacobse van Jacobsdal, die Viljoens van Viljoenskroon, die Groblers van Groblershoop en die Van Zyl's van Van Zylsrus.

Die Wesselse van Wesselsbron het ongelukkig 'n groot krisis gehad en moes die uitnodiging gedweë van die hand wys.

Ds. Boshof van Boshof het die egpaar in die huwelik bevestig. Daar is tot laatnag in die groot saal gekuier en gelangarm. Daniël en Mary was albei stralend gelukkig.

Die meeste gaste het eers in Odendaalsrus en Steynsrus oornag voordat hulle die lang pad terug huis toe aangedurf het.

Daniël het vir Mary 'n spoghuis op Hobhouse gekoop, maar toe Mary hul eerste kleinding verwag, het hulle tweeling toe verhuis.

Albei was verras oor hoe ongelooflik hul lewens verander het. En dit alles het begin met net een koppie koffie op Koffiefontein.  

[Karin Muller: Noordkaap 2014-04-22. Besoek gerus die Noordkaap Bulletin en lees hulle weeklikse rubrieke - daar is baie pitkos in hierdie rubrieke.]

Hartsake oor 'n koppie tee: My hande

Vandag kyk ek na my hande en ek besef ek is lief vir my hande ...
👏 My hande het my trane afgevee as ek gehuil het.
👏 My hande het my deur my skoolloopbaan geneem.
👏 My hande het my kinders vertroos en met liefde vasgehou. 

👏 My hande het hard gewerk om my gesin te voed en te sorg vir 'n skoon huis en klere.

👏 My hande hou my Bybel vas terwyl ek daagliks pitkos daaruit kry.
👏 Nou sit ek my hande saam en bid dat die Here my en almal vir wie ek omgee sal vashou en beskerm...
👏Eendag gaan ek my hande in die Here se hand sit wanneer Hy my na die Ewige Woning neem.
👏 Here, dankie vir my twee hande!!!

Dankie vir 300 000 e-besoeke - ons waardeer elkeen van julle!

'n Opregte DANKIE, liewe e-vriende en e-lesers vir julle volgehoue e-besoeke. Vrydag, 13 Maart, het ons 294 000 trefslae gehad en vier dae later staan ons op 300 000 trefslae.

Dankie vir elke dag se saamlees hier, terugvoer, die deel van stories en bydraes.

Ons waardeer elkeen van julle. Hierdie blad sal nie dieselfde sonder julle wees nie. Geniet die dag en lekker lees!

Uit die Groot Karoo: Schalk se lewensnippers

Oomblik van stilte: 2 Kron. 19:9

En Hy het hulle bevel gegee en gesê: So moet julle handel in die vrees van die Here, met getrouheid en met 'n volkome hart.

Koning Jehosafat het die hele land deurgegaan en aan almal gesê hoe hulle God moes dien. Hy het 'n besluit geneem om almal se harte reg te kry en God eerste gestel.

Neem vandag 'n belangrike besluit in jou lewe; laat jou hart God behaag en stel Hom eerste.

Laat God toe om jou lewe te te verryk met sy Heilige Gees en sy ewige lewe in sy koninkryk. 

Dankie, Jesus, U het my kom haal toe my hart nog sleg was, in donkerte gehul en U het my geheel en al belig met u goedheid en guns. U weet ek was ontrou en net U bly getrou. Laat u Heilige Gees my U, met getrouheid dien en met 'n rein hart; 'n hart wat U gereinig en geheilig het met u bloed. Ek wil U loof en prys, u Naam verhoog. Amen.

[Aangestuur deur Pieter Swanepoel]

Saterdaglagmedisyne: Allerlei

Dokter aan pasiėnt wat baie slegte rokershoes het en ooglopende tekens van te veel drank toon: "Hoeveel sigarette rook jy per dag?"
Pasient: "So 40 dokter."

Dokter: "Dink jy jy sal dit kan opstoot na 80 per dag?"

Pasiënt (wat gemeen het hy gaan aangespreek word oor sy 40): "Seker, dokter, maar hoe dan so?" Dokter: "Miskien val een van jou longe plat en dan is daar meer plek vir jou lewer!"

oooOOooo

Spreuk 204 van Langenhoven: Ry liewer die klip mis as om die man te dagvaar wat hom in die pad ingerol het. 'n Ou as is beter as 'n nuwe eis.

oooOOooo

Nasa het bevind met alle ondersoeke dat uit die ruimte net drie dinge op die aarde duidelik sigbaar is:
1. Grand Canyon
2. Muur in China
3. Gate in die Suid-Afrikaanse paaie

Dankie vir 294 000 e-besoeke - ons waardeer elkeen van julle!

Vanaf Woensdag tot vandag het Ons Huis se blog 3000 trefslae bygekry! 

Dankie vir al ons lojale ondersteuning!

Elke e-leser is vir ons belangrik!

Gedig: Vertrou op die Here

Vertrou op die Here

met al jou probleme.

Vertrou op die Vader

Hy help jou op die daad.

Dink nie aan môre

gee Hom al jou sorge.

Vertrou op die Here

gee Hom al jou probleme.

Jesus weet alles

gee Hom jou pak.

Vertrou op die Here

met al jou probleme.

Jesus maak dit beter

dis nie vergete.

Vertrou op die Here

met al jou probleme.

[Bron: Here, mag ek? Kosmos-gedigte Ina de Beer]

Ouma se wenke: Geniet jou kos, maar probeer om 'n bietjie minder te eet

Ek gaan vandag 'n netelige onderwerp aanroer. Die enigste rede is omdat ek onlangs daarmee gekonfronteer is. Ek gaan dit oor die volgende paar weke versprei.

* Eet gaan daaroor om ervarings en goeie kos te deel.

* Te veel eet kan tot gewigstoename, diabetes en hartsiekte lei.

* Verminder die porsiegrootte van vetterige, styselagtige en soet voedsel as jy oorgewig is.

* Mik vir 'n gebalanseerde bord: 'n kwart proteïne, 'n kwart stysel en die helfte groente en vrugte.  

Dankie vir 291 000 e-besoeke - julle is vir ons belangrik!

Ons waardeer elkeen wat daagliks by ons inloer!

Geniet die leeservaring!

Ongelukkig of dankbaar?

Dit is my verjaardag vandag! 

En ek kan nie besluit of ek ongelukkig of dankbaar moet wees nie!!

Besef julle die enigste tyd in ons lewens wanneer jy wil ouer wees is wanneer ons kinders is?
Jonger as tien, is jy so verskriklik opgewonde oor ouer word jy dink sommer in desimale.
"Hoe oud is jy?" 

"Ek's vier en 'n half."
Jy's nooit 36 en 'n half nie, jy's vier en 'n half, amper vyf.
Dis die geheim.
Nou's jy 'n tiener, niemand kan jou keer nie, jy spring sommer na die volgende syfer toe.
"Hoe oud is jy?" 

"Ek gaan 16 wees."
Jy kan nou 12 wees, maar uiteindelik gaan jy 16 wees.
Dan kom die groot dag, jy word 21.
Selfs die woord klink soos 'n seremonie.
Ja ... jy WORD 21!!!
Dan raak jy 30. 

Wat's besig om te gebeur?
Genugtig, jy klink soos suur melk.
Jy't geRAAK, wat het verander ?
Jy WORD 21, jy RAAK 30.
Dan NADER jy 40 ... nee, bly daar!
En jy BEREIK 50.
Jy WORD 21, jy RAAK 30, jy NADER 40,
Jy BEREIK 50, en dan MAAK jy dit tot by 60.
"Krisis! Ek't nie gedink ek gaan dit maak nie."
Jy WORD 21, jy RAAK 30, jy NADER 40,
Jy BEREIK 50, en dan MAAK jy dit tot by 60.
Teen daai tyd het jy al so baie momentum opgebou, jy TREF 70.
Daarna is dit 'n dag tot dag ding.
Jy TREF Woensdag ...
In jou 80's: jy TREF middagete, jy TREF slaaptyd.
Jy's nie seker of jy gaan wakker word nie.
Jy koop nie meer beleggings nie.
Goeiste, jy koop nie eers groen piesangs nie.
Dis nog nie die einde nie.
In jou 90's gaan jy weer agteruit."Ek was NOU NET 92."
As jy 100 sien, gebeur daar 'n vreemde ding.
Jy raak weer soos 'n kind
"Ek's 100 en 'n half"

[Aangestuur: Klik HIER]

Uit die Groot Karoo: Schalk se lewensnippers

Vandag se internetgebed vir jou: Stap saam met my deur hierdie dag.

Here, hierdie dag is nog onbevlek. Help my om dit so te kan hou. Help my om vriendelikheid en liefde uit te leef teenoor almal met wie ek in aanraking kom. Help my om uit te reik na ander in nood. Om blymoedig en sonder voorbehoud te gee. Al gee ek net 'n glimlag, of 'n brood, 'n sagte aanraking, 'n warm handdruk of 'n drukkie, of al gee ek net 'n luisterende oor, 'n oomblik se stilstaan by iemand wat dit nodig het, of net 'n glas water, laat dit met liefde en omgee geskied.
Here, Gee my krag, wysheid en liefde. Gee my 'n opregte en dankbare hart. Stap saam met my deur hierdie dag. Dan sal ek alles met U hulp kan vermag. Amen

Oomblik van stilte: Sef. 3:5

Die Here het jou oordele opgehef, jou vyand weggeveeg; die koning van Israel, die Here is by jou, jy sal geen kwaad meer vrees nie.

Vrees niks meer nie en laat jou hande nie slap hang nie! (vers 16b)

Die Here jou God is by jou, 'n held wat verlossing skenk. Hy verheug Hom oor jou met blydskap; Hy swyg in sy liefde; Hy juig oor jou met gejubel. (vers 17)

Kyk in die tyd sal Ek met al jou verdrukkers handel; en die wat kreupel is, sal Ek red; en die wat verjaag is, versamel; en Ek sal hulle maak tot 'n lof en tot 'n roem wie se skande oor die hele aarde was.(vers 19)

Here, by U vertoef ek, by U alleen staan ek, want U bewaar my van die bose en U voorsien vir my, my daaglikse voedsel. U versamel my saam met die geseëndes onder die volke volgens die belofte aan u vriend Abraham. Amen. 

[Aangestuur deur Pieter Swanepoel]

Saterdaglagmedisyne - Koos van der Merwe se beurt

Dankie vir al die Koos-grappe wat ingestuur is - geniet dit - dalk is daar 'n Koos ook in hierdie aftreeoord.

* Klein Kosie: "Meneer?"

"Ja, Kosie?"

"Wat het ek vandag by die skool geleer?"

"Hoekom vra jy só 'n dom vraag?"

"Wel, Meneer, dit is wat my pa my gaan vra as hy vanaand by die huis kom."

* Koos se vrou is moeg vir sy gedrinkery. Hulle het 'n hewige gesprek daaroor gehad en Koos het ter wille van die vrede in die huis tot 'n vergelyk gekom.

Stoffel sit reeds van vyfuur af en kuier in die kroeg. Hy merk dat Koos op sy hande by die deur inloop. Nie seker van sy eie toestand nie, sê-vra Stoffel vir Koos: "Bedrieg my oë my of is ek reg as ek sê dat jy op jou hande by die deur ingeloop het?"

"Nee, jy is reg. My vrou het my gisteraand belet om weer my voete in die kroeg te sit."

* 'n Motoris ry oor Koos se voet en Koos stel 'n yslike groot eis teen die man in.

Die man kom met Koos praat om te hoor of hulle nie buite die hof kan skik nie. "Dink jy ek is 'n miljoenêr?"

Koos nie op sy mond geval nie: "Dink jy ek is 'n duisendpoot?"

Gedig: In die Hoëveld

In die Hoëveld, waar dit oop is en die hemel wyd daarbo,
Waar kuddes waaigras huppel oor die veld,
Waar ’n mens nog vry kan asemhaal en aan ’n God kan glo,
Staan my huisie, wat ek moes verlaat vir geld.

En as ek in die gange van die myn hier sit en droom
Van die winde op die Hoëveld, ruim en vry,
Dan hoor ek die geklinkel van my spore, saal en toom,
Sawens as ek bees of skaap toe ry.

Op die Hoëveld, waar dit wyd is, waar jy baie ver kan sien,
(Die ylblou bring ’n knop dan in jou keel)
Staan my huisie nog en wag vir my, wag al ’n jaar of tien,
Waar die bokkies op die leigrafstene speel.

Maar as die tering kwaai word en ek hoor die laaste fluit,
Dan sweef ek na die Hoëveld op die wind
Ek soek dan in die maanlig al die mooiste plekkies uit
Waar ek kleiosse gemaak het as ’n kind.

* Toon van den Heever (1894-1956)

Ouma se wenke: Vlekke (sweet)

Met die hitte wat daagliks elke druppel sweet uit ons pers, moet ons aandag gee aan die sweetvlekke. Dit is nie nodig om moedeloos te raak oor perspirasievlekke op kledingstukke nie. Hier is 'n paar moontlike oplossings.

* Gebruik sommer die wasbak en week die kledingstuk in vuurwarm water en 'n koppie wit asyn. Gebruik 'n houtlepel om dit nou en dan om te roer. Week dit vir 1 uur en was dan soos gewoonlik.

* Hardnekkige sweetvlekke op wit klere kan ook met aspirien verwyder word. Los twee aspirientablette op in warm water en week die vlek daarin vir 'n paar uur. Was dan soos normaal.

* 'n Alternatief is om bloot 'n koppie asyn by die spoelsiklus van jou wasgoed te gooi. Dit moet egter net by koue water gevoeg word. 

*Asyn is ook 'n goedkoop alternatief vir 'n versagmiddel.

* Nog raad vir vlekke op klere is om 'n pasta met bakpoeier en water te maak en dit op die vlek te los vir 1 uur. Was dan soos gewoonlik.

Gelukkig is dit nie nodig om in koue sweet uit te slaan oor die sweetvlekke nie!

Vandag se internetgebed vir jou: Leef vandag

Dankie Vader, dat U ons gemaak het om dag vir dag te leef en nie onnodig in die verlede en toekoms wat net in ons denke bestaan, hoef te leef nie. Help ons om elke oomblik van elke dag te geniet en saam met U te wandel. In Jesus Naam. Amen

Maartmaand-hoogtepunte

Liewe Inwoners

Vandag kyk ons na Maart se pretdae en daar is werklik 'n paar wat die lagspiere gaan prikkel. Geniet die lysie en deel dit sommer met jou tafelgenote as hulle dit nog nie raakgelees het nie.  

1: Grondboontjiebotter-liefhebbersdag

2: Dr. Seuss se verjaardag

3: Wêreldnatuurlewedag

4: Doen Iets-vir-motiveringsdag
5: Wêreldboekedag
8: Internasionale Vrouedag

9: Barbiedag
13: Wêreldslaapdag
14: Pi-dag (Vier met 'n pastei - pie!)
17: St. Patrick's Dag
18: Wêreldwye Herwinningsdag

20: Internasionale Dag van Geluk

20: Wêreld Paddadag

21: Wêreldpoësiedag

21: Internasionale Dag van Woude

22: Wêreld Waterdag

23: Nasionale Klein Hondjiedag
26: Nasionale Spinasiedag

27: Wêreldteaterdag

26: Maak jou eie vakansiedag op vir maksimum pret en absurditeit.

28: Aarde-uur

29: Klavierdag

31: Nasionale Krytdag

Oomblik van stilte: Rom. 10:9&10

As jy met jou mond die Here Jesus bely en met hart glo dat God Hom uit die dode opgewek het sal jy gered word;
Want met die hart glo ons tot geregtigheid en met die mond bely ons tot redding.
Op. 12:11
En hulle het hom (satan) oorwin deur die bloed van die Lam en deur die woord van hul getuienis, en hulle het tot die dood toe hulle lewe nie liefgehad nie.

Oefen jou mond om oorwinnig in Christus uit te spreek.
Bely met jou mond dat Jesus die Here is tot jou redding.
Jou geloof in jou hart dat God Jesus uit die dode opgewek het, bring die geregtigheid, en die bloed van die Lam gee jou oorwinning.
Die Satan, die ou slang, word deur jou getuienis oorwin.

Dankie, Here, vir u woord in my en dit sal my mond bely dat U die Christus en my oorwinning is. Ek glo met my hart dat U die Seun van God is en dat God U uit die dode opgewek het. Ek sal getuig van die redding deur die bloed van die Lam. Ek weet in die geloof dat U my geregtigheid is. Amen.

[Aangestuur deur Pieter Swanepoel]

World Compliment Day

While there is still plenty to be outraged about, many policies to protest and a ton of things in our world that need changing, my heart craves a break from all the criticism and critiques, from the ugly words and angry hearts.

Let us make special use of compliment day.

Tell your caregiver, friends and family members who take over household duties, cook for you, take you to treatment and your medical team, nurses and staff that THEY ROCK!

It may be just the boost people need to continue in their work!!

Enjoy your World Compliment Day!

Saterdaglagmedisyne - Allerlei

* Hoe kan jy 'n draadkar laat olie lek?

Plak 'n Beetle-kenteken daarop.

* Wat is platoniese vriendskap?

Die tydsverloop vandat 'n man aan 'n meisie voorgestel word tot die eerste soen.

* Die belangrike ek, ek en ek

Hoe het die blonde man se grootste vriend hom beskryf?

Hy is 'n selfgemaakte man wat mal is oor sy maker. 

Gedig: Namakwaland

Op die groot saaidag van die heelal
het reeds 'n entjie duskant Wupperthal
oor die kaal Noordweste
'n sakkie van die HEER se beste
saad per ongeluk gelek,
gelek en uitgeval.

* DJ Opperman

Klik gerus HIER vir inligting oor die digter.

Ouma se raad

Ten spyte van verskille, 

kan ons mekaar omhels en waardeer. 

Elke ander een se verskille moet waardeer word 

en moet met waardigheid hanteer word.

Uit die Groot Karoo: Schalk se lewensnippers

Vandag se internetgebed vir jou: Christus leef in en deur my

Dankie, Jesus, dat ek saam met U vir my sondes gesterf het. Dankie, Vader, dat U my saam met Jesus uit die dood uit opgewek het en die Ewige Lewe gegee het. Deur geloof bely ek nou die volgende: Ek is deur genade gered, ek is verordineer, ek is geroep, ek is geregverdig en ek is verheerlik, ek leef nie meer nie, maar Christus leef in en deur my. Dankie dat ek nou soos Jesus nederig en sagmoedig van hart is, ek leef nou vir U. Amen.

Oomblik van stilte: Matt. 27:25

En die hele volk antwoord en sê: Laat sy bloed op ons en op ons kinders kom!

Pasop wat jy sê want jy kan jouself bind aan Satan se bose werke. Moenie vir Satan 'n deur oopmaak om in jou lewe te kom nie.

Israel, aangevoer deur die owerpriesters en oudstes, het Barábbas i.p.v. vir Jesus gekies.

Daarby het hulle gesê dat sy bloed oor hulle en hulle kinders kon kom.

En so het dit gebeur, 40 jaar later het die Romeine hulle byna uitgewis en is die hele Jerusalem verwoes en die Israeliete die wêreld vol weggevoer.

Tot vandag toe, 2000 jaar later, word Israel steeds getreiter en sterf nog baie van hulle (Hitler) op die slagveld.

Here, ek vra vergifnis as ek verkeerde dinge oor myself en my huis uitgespreek het. Here, ek bind ook ander vyandiggesinde mense se woorde wat oor my en my gesin uitgespreek is. Here ek bind myself en my gesin aan die Seun van God se bloedverbond en nou weet ek dat geen wapen wat teen my gesmee is, iets kan uitrig nie en dat elke woord wat teen ons uitgespreek is, in die gereg weerlê sal word. Ek en my gesin is nou maar eenmaal die geseëndes van die Here. Amen.

Saterdaglagmedisyne - 'n Alternatiewe manier (Deel 2)

Soek u nuwe maniere om stres te hanteer? Hier is nog vyf:

1. Voltooi jou inkomstebelastingopgawe in Romeinse syfers.

2. Staar na mense deur 'n vurk en berbeel jou hulle is almal in die tronk.

3. Stuur jou dokter 'n rekening vir die tyd wat jy in sy ontvangskamer moes wag.    

4. Skryf 'n kortverhaal deur alfabetsop te gebruik.

5. Sing vir jou troeteldiere 'n aria uit Giuseppe Verdi se Rigoletto.

[Bron: Finansie & Tegniek, 2 Augustus 1996]

Gedig: Die dans van die reën

DIE DANS VAN DIE REËN
Lied van die vioolspeler. Jan Konterdans.
Uit die Groot Woestyn

O die dans van ons Suster!
Eers oor die bergtop loer sy skelm,
en haar oge is skaam;
en sy lag saggies.
En van ver af wink sy met die een hand;
haar armbande blink en haar krale skitter;
saggies roep sy.
Sy vertel die winde van die dans
en sy nooi hulle uit, want die werf is wyd en die bruilof groot.

Die grootwild jaag uit die vlakte,
hulle dam op die bulttop,
wyd rek hulle die neusgate
en hulle sluk die wind;
en hulle buk, om haar fyn spore op die sand te sien.

Die kleinvolk diep onder die grond hoor die sleep van haar voete,
en hulle kruip nader en sing saggies:
“Ons Suster! Ons Suster! Jy het gekom! Jy het gekom!”

En haar krale skud,
en haar koperringe blink in die wegraak van die son.
Op haar voorkop is die vuurpluim van die berggier;
sy trap af van die hoogte;
sy sprei die vaalkaros met altwee arms uit;
die asem van die wind raak weg.
O, die dans van ons Suster!

[Uit: Versamelde gedigte – Eugene Marais]

Ouma se wenke: Geel vlekke op klere en stoele

* Hardnekkige sweetvlekke op wit kledingstukke: Meng een deel water met vier dele waspoeier en smeer dit aan die plekke (aan die binnekant van die klere). Laat dit vir een uur staan en borsel dan liggies. Spoel die kledingstuk skoon met koue water. Week dit dan oornag in koue water gemeng met vier eetlepels waspoeier. Was dan soos normaalweg.

* Geel sweetvlekke op wit klere: Meng een deel Sunlight liquid of Handy Andy met een deel Hydrogene Peroxide Solution 30%. Gooi oor vlekke en laat staan vir ‘n uur. Vir hardnekkige vlekke kan 2 eetlepels koeksoda bygevoeg word en liggies gevryf word. Was normaal. Die kolle behoort te verdwyn!

* Geel vlekke op tuinstoele: Wend die volgende pasta aan op wit plastiek stoele wat geel vlekke vertoon: 1 e kremetart op 100 ml bleikmiddel. Laat staan vir sowat 10 minute en spoel dan met skoon water af.

Moenie 'n emmer koue water oor hierdie planne uitgooi nie!

Uit die Groot Karoo: Schalk se lewensnippers

Vandag se internetgebed vir jou: Lei ons na die wysheid

Liewe Here, U wysheid en krag is meer as wat ons kan verstaan.
Dankie dat U naby is, in die gewone en kleine.
Help ons om U raad in ons daaglikse lewe te vind.
Om U teenwoordigheid in ons tuistes te erken.
Lei ons na die wysheid wat reeds hier is.
Amen.

Oomblik van stilte: Luk. 24:32

En hulle sê vir mekaar: Was ons hart nie brandend in ons toe Hy met ons op die pad gepraat het en Hy vir ons die skrifte uitgelê het nie?

Sodra jy met God begin praat, begin jou hart brand vir die openbaring van God se Woord. Hulle het toe met elf en die ander gaan praat. Hulle het vir hulle vertel hoe Hy aan hulle bekend geword het by die breking van die brood.

Bid gereeld tot God en Hy sal die brood (die woord - sy liggaam) aan jou oopbreek en Homself aan jou openbaar.

Dankie vir u woord wat ek elke dag kan lees en dat U uself aan my openbaar by die breking van die brood. As U, u woord aan my openbaar deur die breking van die brood, die skrifte deur die Heilige Gees geïnspireer, is my hart brandend om meer van U te leer en wil ek dit graag met ander deel. Dankie, Here in Jesus se Naam. Amen.

Saterdaglagmedisyne - Oupa

* Wat noem jy 'n vrou wat 24 uur per dag weet waar haar man is?

'n Weduwee.

* Ouma besluit om op haar oudag vir haar lisensie te gaan. Sy het die tyd en dan kan sy die inwoners van die ouetehuis lekker rondry. Haar kinders is glad nie ten gunste van hierdie nuwe gier van ouma nie.

Sy het vir haar eerste probeerslag nege uit tien vir haar bestuurslisensie gekry ...

Al nege was voetgangers.   

* 'n Oupa moes vir die eerste keer in jare na sy drie kleinseuns kyk, terwyl hulle ma winkel toe is.

Die latte is moeilik en die oupa kon dit later nie meer hou nie.

Hy besluit gebed is die beste uitweg. Maar al wat teen daardie tyd aan kan dink is: "Ag, Vader, gee my asseblief liefde, genade en geduld, maar net nie krag nie - want dan foeter ek hulle." 

[Finansies & Tegniek, 10 Mei 1996]

Gedig: Die wêreld is ons woning nie

Die wêreld is ons woning nie.
Dit merk ek aan die son wat wyk,
en ‘k merk dit aan die reier wat
mistroostig na die son sit kyk
op een been, in die biesievlei.
En is die laaste strale weg,
dan rys ‘n koue op uit die vlei.
‘n Koue gril deurhuiwer my;
en ‘k sien dit dan in alle ding
wat in die skemer my omring:
die wêreld is ons woning nie.

Die wêreld is ons woning nie.
Dit sien ek as die bloedrooi maan
van agter veldstof opgegaan,
nog net die kerk se dak bestryk,
vanwaar ‘n uil, misterie-stom,
sit na die maan se skyf en kyk.
En nou dit stil word op die straat,
dink ek hoedat die middag laat
‘n lykstoet daar het uitgekom
waar nou die maan en uil ontmoet.
En ‘k merk dit dan aan alle ding
wat in die aandstond my omring:
die wêreld is ons woning nie.

Die wêreld is ons woning nie.
Dit voel ek as die wind ontwaak,
as die eikebome knars en kraak;
dit hoor ek in die fladdering
van voëltjies wat hul vlerke slaan
teen die verwarde boomtakke aan.
En as ek nader kom, dan vind
ek by die maan se wisselstraal
‘n nes vol kleintjies deur die wind
omlaaggeslinger, dood, verplet.
Ek voel dit dan aan alle ding
wat in die nagstond my omring:
die wêreld is ons woning nie.

* Totius

Bron: Totius's Post - klik HIER

Ouma se wenke: Vlekke

* Handdoeke: Om vlekke op 'n handdoek te verwyder, vryf vlek met 'n bietjie Dettol.

* Handdoeke wat hard uit die was kom - veral as water brak is - kan saggemaak word deur die handdoeke in warm water met seep en ongeveer 'n handvol opgelosde sout te gooi. Moet nie 'n versagmiddel gebruik nie. Spoel die seep goed uit. Spoel weer, maar gooi so 2 eetlepels wit asyn in die laaste uitspoelwater.

* Bly weg van versagmiddel wanneer jy handdoeke was. Dit het 'n oliebasis en bou op. Pleks van versagmiddel kan jy 'n koppie wit asyn gebruik.

* Was met growwe sout, en spoel met asyn

* Koeksoda is 'n goeie vlekverwyderaar en sal die meeste vlekke van jou handdoeke verwyder.

Moenie die handdoek ingooi oor hardnekkige vlekke op die handdoeke nie.

Uit die Groot Karoo: Schalk se lewensnippers

Vandag se internetgebed vir jou: Leer my om te wag sonder om te twyfel ...

Here, leer my om te wag sonder om te twyfel, 

en om aan te hou glo

wanneer niks verander nie. 

Versterk my hart - 

nie net vir die eindpunt nie, 

maar vir die pad daarheen. 

Help my om te sien dat U naby is, 

selfs in die stilte. 

Laat my geduld getuig 

van my vertroue in u tydsberekening. 

Amen