Hierdie is ’n anderste storie van hoop.
Dit kos lees, dink, weer lees en weer dink.
Dinti de Beer, my suster se skoondogter, het deur dieptes van groot hartseer gegaan. Vroegoggend is sy wakker gemaak met die tyding dat haar eggenoot vroeër die nag in ’n motorongeluk oorlede is. Na jare se nag van hartseer het die son weer opgekom en het die Here vir haar weer ’n gelukkige en bestendige huwelik gegee. Sy verwoord dit op ’n besondere manier in haar gedig Wyn.
Met die lees en herlees gaan jy vind dat iets daarvan resoneer in jou hart. Jou gedagtes gaan jou terug lei na soortgelyke ervaringe op jou lewenspad.
Geseënd is jy as jy ook kan sê: “U't die lag in my weer laat tuiskom ...”
Wyn
29/6/21
'n duisend dae en nagte
het ek my trane uitgetel
gebottel en gepars
in die kelders van my hel
nou is elkeen opgeskryf
in U boek
tussen die watervlekke
van my sin na alles soek
en vandag
toe die son op my hand kom skyn
toe weet ek dit:
ek het gekry wat ek
gevra het 'n duisend dae terug
vandag toe die veerlig wig van vrede
my hart gelyk kom maak
toe weet ek dit:
ek het gekry wat ek
gevra het 'n duisend nagte terug
U't die lag in my weer laat tuiskom
die uitsien en die hoop
kan kom verouder in my kelder
wat mos was word verfyn
gebottel uit die pyn
No comments:
Post a Comment