Liz' thoughts

Click HERE for more.

 

Ons kla ...

Ons kla oor grys hare -

'n kankerpasiënt wens sy het hare gehad!

Ons kla oor nuwe skoene -
die kreupele wens hy het voete gehad!

Ons gooi kos weg -
honger mense bid net vir stukkie brood!

Ons baklei en vloek ons geliefdes -
êrens in die lewe sit iemand alleen
en bid vir liefde om oor hulle pad te kom!

Ons ouers irriteer ons soms of ons opinies verskil -
maar êrens in 'n ouetehuis sit ou mense
en bid vir 'n kuiertjie van hul kinders wat hulle weggegooi het!

Ons baklei met ons kinders en ons kinders met ons -
êrens sit 'n ma of 'n kind by 'n graf en ween
en wens net vir nog een dag saam met daardie persoon!

Ons bekommer onsself oor watse geskenk ons gaan kry of koop -
êrens sit n ma en bid dat sy net die Kersfees 'n brood
en 'n bottel aanmaakkoeldrank en miskien n stukkie hoender vir haar kinders kan voorsit!
Wat nog te sê 'n geskenk?

Ons moan oor vet of maer wees -
êrens veg iemand om oorlewing en wag vir 'n orgaan!

Wees dankbaar vir wat jy het,
wie in jou lewe is
en wees tog geduldig
en klaar dinge uit op 'n mooi manier!

Dink oor hoe geseënd jy is
en hoe jy dinge sommer maar net verwag omdat dit jou toekom!
Dis aardse goed en 'n gejaag na wind!

Hartsake en liefde is meer werd
as enige groot duur geskenk of 'n nietige bakleiery!

Die dood is so finaal,
maak die beste van jou en jou geliefdes se lewe!!!!
[Anoniem]

Verjaardagwense

Mev. Hanekom, baie geluk met u verjaardag. Mag elke oomblik gevul wees met ons Vader se groot genade. Vreugde vir 'n heerlike dag.

Woensdagwense: week 45

Tips from Granny: Honey takes the sting out of scars

“My grandmother always put honey on our wounds to help them heal faster and reduce the appearance of scars. Now there is even research to back up what she said, and honey is even used on surgical scars today.”

'n Uit-die-hart-dankie!

Aan ons Saterdag-engele
Dankie vir julle omgee, uitreik, liefde en heerlike bederfies.
Ons sien uit na julle besoeke en waardeer julle kuiers!
Vreugde en seën vir julle!
Ons Huis-inwoners!!

Maandagoggend-waarheid

Marie Moses, 'n jarelange inwoner van Kimberley, het vanoggend 'n gesprek gedeel wat sy en haar kinders oor die naweek gehad het.

Sy het hulle herinner aan die bekende, sowel as die onbekende. 

"Ons ken ons geboortedatum - dag, maand en jaar - ons weet wanneer die seisoene verander en die somer aanbreek. Maar ons ken nie ons terugkeerdatum nie. Net God alleen weet dit."

[Gaan lees gerus die onderhoud HIER wat met Marie in 2019 gevoer is.]

Vandag se internetgebed vir jou: Oggendgebed

Vrae wat die geselskap om die etenstafel 'n hupstootjie kan gee

Vra gerus hierdie vrae aan jou tafelgenote en kyk hoe die gesigte eers op 'n dinkplooi getrek word, daarna breek die lig deur en dan praat die vier of ses tafelgenote gelyktydig. Geniet dit en stuur gerus nog interessante tafelgespreksvrae in.  

'n Soet Saterdag in November

Wat 'n heerlike Saterdagoggend was dit nie? Die engele, gewapen met smaaklike kolwyntjies, het ons kunstalente weer beproef en sommer goeie oefening ook gegee. Daar was versierings te kus en te keur en ons kon ons kolwyntjies ryklik versier met 'n swaar hand!    

Dankie vir 'n heerlike kuier ... dankie dat ons ons naweek op 'n hoë soet noot kon begin en dankie vir die heerlike eetgoed. Ons waardeer julle!  

Foto's: Millie Mouton

Saterdaglagmedisyne: 'n Paar komiese antwoorde, deur A.G Visser.

Spesiaal vir pensioenarisse op die vraag: Hoe gaan dit?

1. Baie goed ... ek het vanoggend darem mos bo die grond wakker geskrik.
2. Wel, opgestaan en self aangetrek.
3. Nie te goed nie ... ek het soveel pyn dat ek nie eens plek het vir almal nie.
4. Ag my vriend, ek kla nie oor my pyne nie, want ek kry dit verniet.
5. Dit gaan baie goed, elke pyn is op sy regte plek.
6. Ek is darem nog padwaardig, maar moet net nie my enjinkap oopmaak nie.
7. Wel wel wel, ek kners op my agtertande en glimlag met my voortande.
8. Ek voel vandag soos 'n kriek wat Doom ingekry het, ek beur al na die een kant toe.
9. Dit gaan op-en-af en heen-en-weer soos met 'n bak jellie wat onrustig is.
10. Dit gaan tussen sleg en verskriklik.
11. Ek druk deur, al maak dit seer.

[Dankie, Elmari, vir die tong-in-die-kies-antwoorde.]

Resep: Mieliemeelvetkoek

Bestanddele

2 koppies krummelpap

1,5 koppie melk (kan suur- of karringmelk ook gebruik)

2 eiers

sout na smaak

2,75 tl bakpoeier

1.5 koppie koekmeel

Metode

• Klits eiers, melk en sout saam.
• Voeg pap by - meng goed.
• Sif meel en bakpoeier by - meng goed.
• Bak in warm olie soos gewone vetkoek.  

Een van die inwoners het 'n klompie mieliemeelresepte met Ons Huis gedeel wat die volgende paar Saterdae  geplaas gaan word.

Verjaardagwense

Mnr. Oosthuizen, hartlike wense vir 'n gelukkige dag. Mag vreugde en liefde jou deel wees vir die res van die dae wat op u wag. Geniet hierdie dag!

Weekly message from the angels

May your day be filled

with all kinds of 

bright sunny things!

November-verjaardae

2 - Mnr. H Oosthuizen

7 - Mev. S Hanekom

16 - Mev. J van Staden

25 - Mev. A van den Berg

26 - Mev. E Lambert

Gebed van 'n ou spoorwegman ...

'n Ou spoorwegman het op 'n byeenkoms tot bekering gekom en is gevra om te bid. Hy het 'n oomblik geaarsel en toe eerbiedig met 'n bewende maar helder stem gesê:

O Here, noudat ek die vlag gestryk het, bid ek U, neem my voete van die ruwe spoorbaan af en plaas hulle veilig bo-op die trein van redding. Laat wysheid my handlamp wees en die Bybel my hooflig. Laat die trein gekoppel wees met die sterk skakel van liefde. En ... Hemelse Vader, hou alle wissels gesluit wat na sylyne uitdraai en veral dié wat lei na 'n doodloopstraat.

O Here, as dit U wil is, laat elke sinjaal langs die lyn die witlig van hoop vertoon, sodat ek die lewensreis kan aflê sonder om stil te hou. En Here, laat die tien gebooie my rooster wees. En wanneer ek die reis afgelê het en in die groot donker stasie van die dood ingetrek het, mag die Superintendent van die Heelal sê: "Mooi so, goeie en getroue dienaar, kom teken die betaalstaat en ontvang jou loon van ewige geluksaligheid."

(Uit: Senior Bulletin - "Oom" van Vryheid)

Woensdagwense: week 44

Vandag se internetgebed vir jou: Dankie, Here

Gebed: Terwyl ons siek is ...

Here, wanneer ons siek is en vrae vra, is dit U wat ons hand neem en ons dra.

Wanneer ons swak is en soms só moeg voel weet ons met alles het U 'n perfekte plan en doel. 

Net U ken die begin en einde van ons lewe en in geen situasie sal U ons ooit, ooit  begewe nie.

Daarom sal ons in gesondheid en siekte u naam prys. U is ons Geneesheer en u sal die pad vir ons aanwys!

Resep: Mieliemeelmuffins

Bestanddele

2 koppies mieliemeel
2 koppies koekmeel
5 ml sout
35 ml bakpoeier
3 groot eiers
500 ml melk
1 blikkie sweetcorn
1 blikkie heelpitmielies
250 g botter of magarien, gesmelt

Metode

• Voorverhit die oond tot 180 grade C.
• Klits eiers en melk saam.
• Voeg die mielies en botter by en meng goed.
• Voeg die mieliemengsel by die droë bestanddele en meng liggies.
• Skep die beslag in groot muffinpannetjies.
• Bak vir 30-35 minute of tot goudbruin en gaar.
• Laat vir 10 minute in die pan afkoel.
• Haal 12 heerlike groot muffins uit.
• Geniet!!

Een van die inwoners het 'n klompie mieliemeelresepte met Ons Huis gedeel wat die volgende 4 Saterdae  geplaas gaan word.